اختلاف

وفي زول ‫#‏ما_بشبهك‬ ، انت وهو مختلفين عن بعض اختلاف تام ، هو بنسى كتييير وانت النوع البتذكر اي حاجه وما بتفوت شي ، وكل مره هو ينسى وانت تذكرو ، هو ينسى وانت تذكرو لدرجة انو تقدر تقول انك بقيت ليهو‫#‏منبه_حياتو‬ ، قد تتضايق منو مرات وتزهج من انو دايما بنسى ، وانك دايما بتذكر فيهو ، بس الغريبه انو بكون مبسوط بيك شدييييد وممكن كمان مرات يعمل فيها ناسي قااااصد ، عشان عاجباهو فكرة انو عندو زول بهتم ليهو بحاجاتو اكتر منو هو ذااااتو ♡

زول لا بشبهك لا اهتماماتكم وحده ، لا بتسمعو نفس الفنان ولا عندكم نفس الهوايات ، بس الغريبه انك ممكن تسمع اغنيه اغنيتين لي فنان ما فنانك وتحبهم وتفضل تسمع فيهم كل يوم لحدي ما تحفظهم صم ،لمجرد انو رسلهم ليك وطلب منك تسمعهم عشان خاطرو ♡

مختلفين شديد ، انت بتحب تتكلم معاهو بالتلفون كتييير وهو بحبك انت وبحبك شدييد كمان، بس ما بحب يتكلم كتير ، بس الغريبه انو مرات بحب يسمع كلامك الكتييير دا ، بفتشك عديل عشان يسمعك ان شاء الله لو هو فضل ساكت او حتى نام ليك في التلفون المهم انو يسمعك ويكون معاك ♡

زول على قدر ما انو بينكم اختلافات كتييره الا انك بتلقى نفسك مجذوب ليهو ذي كأنو في بينكم مغنطيس ، والغريبه انو اختلافك عنو هو المخليك بتحبو ، ومخليهو ما شايف غيرك ..
ما الأقطاب المختلفه داااايما بتتجاذب