لــــوو

لو لي أي سبب ما نجحت علاقتك بي زول ،
و ما ح نقول فشلت لأنو الموضوع عبارة عن تجربة ،
نجاحها نعمة و عدم نجاحها إختبار ح يبقيك أحسن ..
أوعك تختمي على نفسك بعبارة فاشلة ،
أو يتهيأ ليك إنك ما صالحة لأي إرتباط ..
إياك تختي اللوم عليك براك ،
ولا ثقتك في نفسك تتهز ..
لأنك كنتي في شراكة ،
مش في علاقة مع نفسك ..
نجاحها مسؤولية مشتركة مع شريكك ،
و كذلك عدم تطورها و مشيها لي قدام ...!!
.
لو لقيتي إنك ما مالية عين زولك ،
أو ما مكفياهو ولا ما مقتنع بيك ..
ده ما بالضرورة بيعني عيب فيك ،
ممكن يكون هو عينه زايغة ،
و ما بيملاها إلا التراب ..
أو إنكم بس ما متلائمين ،
و ما مناسبين لي بعض ..
و هنا لو عاينتوا بالراحة ح تلقوا إنو قرار فراقكم ،
كان أنسب شي حصل ليكم و ح تحمدوا ربنا عليهو ...!!
.
عليه أوعك تخافي من إنك تتعافي ،
أو إنك تاخدي فرصة تانية لو جاك زول مناسب ..
استفيدي من اللي فات ،
صلحي في روحك اللي انت شايفة إنو ما صاح ..
و نهاااائي ما تحاولي تغيري الحاجات السمحة فيك ،
حتى لو كانت تجربتك السابقة حسستك إنها شينة ..
خليك مقتنعة بي روحك و أبقي نفسك ،
ما تتصنعي عشان ترضي زول ..
لأنك لو ما راضية عن روحك ،
و مهما حصل ليك من تفاصيل سمحة ،
عمرك ما ح تعرفي معنى السعادة الحقيقية ...!!
.
المهم :
ما ينطبق على البنات ،
يسري على الأولاد ...!!
.
المهم شديد :
كلكم بتستاهلوا الفرح ،
و بتستحقوا الحياة ...!!